عەلی حەمە ساڵح
ئەندامێكی فراكسیۆنی گۆڕان لە پەرلەمانی كوردستان ئاشكرای كرد، لە سنووری سلێمانی یەكێتیی نیشتمانیی كوردستان 500 دۆنم زەوی بە شاسوار عەبدولواحید داوە و چەندین كاری نایاساییشی لێ ئاشكرا كرد.
عەلی حەمەساڵح لە پێگەی تایبەتیی خۆی لە تۆڕی كۆمەڵایەتیی (فەیسبووك) تۆمارێكی دەنگی بڵاو كردۆتەوە كە تێیدا لەگەڵ بەناو ڕۆژنامەنووسێكی سەر بە شاسوار عەبدولواحید قسە دەكات و تێیدا دەردەكەوێ، ڕۆژنامەنووسەكە باسی بڵاوكردنەوەی راپۆرتێك لەسەر موڵك و ماڵی ئەو پەرلەمانتارە دەكات، بەڵام عەلی حەمەساڵح تێیدا دەڵێ: ”ئەگەر یەك مەتر زەویم لە سلێمانی هەبێت، با بخرێتە سەر ئەو 500 دۆنم زەوییەی یەكێتی لە پارێزگای سلێمانی بە شاسوار عەبدولواحیدی داوە“.
هاوكات لە نووسینێكیشدا كە لەگەڵ تۆمارە دەنگییەكە بڵاوی كردۆتەوە، عەلی حەمەساڵح دەڵێ: ”من ڕقم لە هیچ کەس نییە، بەڵام لەبەر ئەوەی لە کەناڵەکەی دەربکەوم یان لە پەیجەکانی جنێوم پێ بدات، ناتوانم چاوپۆشی لە کەس بکەم“.
ئەوەشی ئاشكرا كردووە، بۆ چەند دۆسیەیەکی شاسوار عەبدولواحید، سكاڵای لە لا كراوە و ئەویش بەدواداچوونی كردووە، ”وەک هەموو دۆسیەکانی دیکە، لە کەناڵەکەی و پەیجە ساختەکانیەوە هەڵمەتێكی پڕ لە چەواشەکاری دژی من دروست كرد، بەهیوای ئەوەی من بترسم و کۆڵ بدەم بۆ ئەوەی قسەم لەسەر نەکات، بەڵام من هەرچەندە خۆشم ببمە قوربانی، ناتوانم دەستبەرداری کاری پیشەیی خۆم بم“.
بەپێی نووسینەكەی عەلی حەمەساڵح بێت، ئەمانە بەشێك لە دۆسیەكانی شاسوار عەبدولواحیدن:
-دادگا بڕیاری لەسەر وەرگرتنەوەی ٧٥ ملیار دیناری قەرزی حكوومەت لە کۆمپانیای نالیا داوە، تا ئێستا لێی وەرنەگیراوەتەوە.
-پارەی ژمارەیەکی زۆر هاووڵاتی قەرزارە و نایداتەوە، یەکێک لە دۆسیەکان کوردێکی باکوورە و یەک ملیۆن و ٣٦٤ هەزار دۆلاری قەرزارە، ”ئێستا پارەی هاتوچۆشی پێ نییە“.
-زیاتر لە دوو ملیار دیناری کارەبا قەرزارە، نایداتەوە و بڕیاری دادگاش دەرچووە.
-کۆشکێکی کردووە، زیادەڕۆیە و لەژێر تاوەری کارەبادایە، لەگەڵ چەندین سەرپێچیی دیکە لە سەر زەویی گشتی کردوویەتی.
-لە پرۆژەکانی (گوندی ئەڵمانی یەک، دوو، سێ)، نالی ستی و کورد ستی.. هیچ خزمەتگوزاریەکی وەک خوێندنگا و بنکەی تەندروستی و داینگە و… هتد نەکردووە، ”تەنانەت قوتابخانەیەکی لە گوندی ئەڵمانی کرد، فرۆشرا بە ئەهلی“.
لە كۆتاییشدا پرسیاری ئەوەی كردووە، ”ئایا من چاوپۆشی لەمانە بکەم بۆ ئەوەی لە کەناڵ و پەیجەکانی جنێوم پێنەدات؟“.
نا ڕاستەوخۆش باسی لە دۆسیەیەكی نهێنیی شاسوار عەبدولواحید كردووە و نووسیویەتی: ”باسی شەراکەت لەگەڵ ئیدارەی گشتی و ڕێککەوتنی حەوتی مانگی سەرکۆمار ناکەم! هەروەها چۆن دەنگدرا بە حەلبوسی!“.