جێگری سەرۆکی لیژنەی دارایی پەرلەمانی عێراق ڕایدەگەیێنێ، گرفتی مووچەی مانگەکانی 10 و 11 و 12ی مووچەخۆرانی هەرێمی کوردستان چارەسەرکراوە و سوودانی و تەیف سامی واژۆیان لەسەر خەرجکردنی کردووە.
دوای سەردانی محەممەد شیاع سوودانی، سەرۆکوەزیرانی عێراق بۆ هەرێمی کوردستان و کۆبوونەوەی لەگەڵ سەرۆکوەزیران مەسرور بارزانی لە هەفتەی ڕابردوودا، واژۆی لەسەر چارەسەرکردنی کێشەی بەردەم سێ مووچەی کۆتایی ئەمساڵ کردووە.
ئیخڵاس دلێمی، جێگری سەرۆکی لیژنەی دارایی لە پەرلەمانی عێراق ڕاگەیاند: ڕێککەوتن لەسەر ناردنی مووچەی مانگی 10 و 11 و 12ی مووچەخۆرانی هەرێمی کوردستان کراوە و ئەو بودجەیەش کە تەرخان کراوە بەشی مووچەی ئەم سێ مانگە دەکات.
ئیخڵاس دلێمی باسی لە کێشەکە و چارەسەرەکەی کرد و وتی: "کێشەیەک هەبوو چارەسەرەکەی پێویستی بە گواستنەوە هەبوو لە بودجەدا لە بڕگەیەکەوە بۆ بڕگەیەکی دیکە، ئەمەش پێویستی بە واژۆی وەزیری دارایی هەبوو، وەزیری دارایی واژۆی کرد و نووسراوەکەی بەرزکردەوە بۆ بەڕێز سەرۆکوەزیران، سەرۆکوەزیرانیش دوای ئەوەی چاوی کەوت بە بەڕێز سەرۆکوەزیران مەسرور بارزانی، ڕێککەوتن لەسەر ئەوەی مووچەی ئەم سێ مانگە خەرج بکرێت".
بەهۆی نەمانی پارەی نەختینە لە پشکی مووچە لە بودجە، کێشە بۆ بەشێکی مووچەی مانگی 10 و مووچەی مانگەکانی 11 و 12دروست ببوو. حکومەتی هەرێمی کوردستان بۆ مووچەی ئەم سێ مانگە پێویستی بە نزیکەی دوو تریلۆن و 900 ملیار دینارە، تەنیا 700 ملیار دیناریشی لە پشکی مووچە لە بودجەی ساڵی 2024 مابوو، بەڵام لە پشکەکانی دیکەی بودجە سێ تریلیۆن دیناری مابوو و پێویست بوو بۆ پشکی مووچە بگوازرێتەوە، ئێستاش ئەو کێشەیە چارەسەر کراوە.