ئەندامێكی پەرلەمانی كوردستان ئاشكرای دەكات، ئەو زەوییانەی سلێمانی كە بڕیار بوو بە مامۆستا و فەرمانبەران بدرێت، لە لایەن دەسەڵاتدارانی ئەو شارەوە مەتر مەتر كراون و فرۆشراون.
عەلی حەمەساڵح، ئەندامی پەرلەمانی كوردستان، لە پێگەی خۆی لە تۆڕی كۆمەڵایەتیی (فەیسبووك) بڵاوی كردەوە: ”هەموو ئەو زەوییانەی بڕیار بوو بدرێنە مامۆستا و فەرمانبەرانی سلێمانی، دەسەڵاتداران مەتر مەتری دەکەن و دەیفرۆشن."
ڕوونیشی كردەوە: ”تیمێکیان دروست کردووە، بەردەوامن لە بەنایاسایی مەتر مەتركردنی زەوی، ناوی دەنێن (تازە ئیفراز). ئەو زەوییانەی دەبوو لە سلێمانی بیدەن بە مامۆستا و فەرمانبەر، خۆیان مەتر مەتری دەکەن، دواتر کۆمپانیایەکیان لە سەرچنار داناوە بە ناوی (ما.....) فۆڕمی بۆ دروست دەکەن و ڕێگەپێدانی بۆ دەکەن."
بە گوتەی عەلی حەمەساڵح، تا ئێستا نزیکەی (٨٠) هەزار پارچە زەوی بە نایاسایی مەتر مەترکراوە و بەردەوامیشن، بە بێ حکوومەت و تاپۆ و شارەوانی، بەهاکەشی زیاترە لە یەک ملیار دۆلار."