قارەمان عوسمان:دەستهەڵاتدارانی زۆنی سەوز دەیدزن داهات بۆ حکومەت بەرپرسیارە؟


 

‎ئەوان دەیدزن، بۆ حکومەت بەرپرسیارە؟


‎ حکومەتی هەرێمی کوردستان کار دەکات بۆ بەرزکردنەوەی داهاتی ناوخۆی هەرێم و گەیاندنی بە ئاستێک کە چیتر لەژێر هەژموونی حکومەتی ناوەندی و هەڵسوڕێنەرانی ئیقلیمی حکومەتەکەی بەغدا نەبین.  و ئەوانەی خەون بە رووخاندن و لاوازی هەرێمی کوردستانەوە دەبینن و کاری هەمیشەییان هێشتنەوەی هەرێمی کوردستانە لەژێر هەژموونی داگیرکەران، بە فەرمی دەستییان کردووە بە دانانەوەی لوغمی سیاسی و زیادکردنی فشاری ئابووری بۆ سەر حکومەتی هەرێمی کوردستان و بەیەک ئاواز لەگەڵ حکومەتی ناوەندی کار دەکەن بۆ لە پەل و پۆ خستنی هەرێمی کوردستان لە توانایی ئابووری، ئەویش بە نەگەڕاندنەوەی داهاتی ناوخۆی دەڤەری ژێر هەژموونیان (سلێمانی و هەلەبجە و ئیدارەی گەرمیان و ئیدارەی ڕاپەرین) بۆ خەزێنەی حکومەتی هەرێمی کوردستان.


‎ئەمە لە کاتێکدایە کە کۆمپانیا و کەرتی تایبەتی ئەو زۆنە و خەڵکەکەی هیچ کەمتەرخەمییەکیان نەکردووە، لە دانی باج و ئەو پابەندییە داراییانەی کە لەسەریانە، پارەکان دەنێرن بەڵام بەبێ ئەوەی جەنابی وەزیری دارایی کە سەر بە حیزبێکی سەرەکی ئەو زۆنەیە ئەو ڕاستییانە باس بکات، لە بانکەکان پارەکان دەدزرێن و جەنابیان تەنها دەرکردنی بەیاننامە و ڕاگەیاندنی ئەوەی کە پارە لە بانکەکانی سلێمانی نەماوە بۆ دابەشکردنی مووچە و کڕینی دەرمان، کردووەتە پیشەی خۆی و نەعامە ئاسا سەری کردووە بەژێر خۆڵەکە بۆ ئەوەی کەس نەیبینێت و فشارەکان لەسەر حکومەتی هەرێم زیاتر ببن؟!


‎بەشێک لە خەڵکی و ڕۆشنبیر و کۆمەڵگای مەدەنی و هەرچی کەمپینچی هەیە، بۆ ئەم بابەتە و لوشکردنی قوتی خەڵکی لەو زۆنە بێ دەنگن و لە جیاتی ئەوەی فشار لەسەر دەسەڵاتدارانی ئەو زۆنە دروست بکەن بۆ دابینکردنی مافی فەرمانبەران، پەڵاماری حکومەت و کابینەی نۆیەم دەدەن!


‎سەرەڕای ئەم بابەتە حکومەتی هەرێم لە داهاتی هەولێر و دهۆک مووچەی فەرمانبەرانی ئەو زۆنە ماف خوراوە دابین دەکات، و بەردەوامە لە پارێزگاری کردن لە یەکپارچەیی هەرێمی کوردستان.

‎بەڵام لێرەدا حەق وایە خەڵکی لەو زۆنە پرسیارێک لە خۆیان بکەن؟ باشە کە سەران و دەستەڵاتدارانی ئەو زۆنە پارەکانیان بدزن و بانکەکانیان بەتاڵ بکەن لە پارە! بۆ حکومەتی هەرێم لە کەم و کورتییەکان و نەمانی پارە لە بانکەکانی ئەو زۆنە بەرپرسیارە؟


#QahramanOthman

أحدث أقدم

نموذج الاتصال