کولانە پەکەکە!
هەرکەس کولانەکەروێشکی لە حەوشەی ماڵەکەیدا دروست کرد، دەبێت: چاوەڕێی هاتنەژوورەوەی(مار)یش بکات.
هەر پڕۆژەو گربوونەوەیەک ئەگەر دانەماڵدرێت لە لایەنگیری نەک هەر سەرکەوتوو نابێت، بگرە دەشبێتە خاڵێک بۆ لاوازی زیاتر و گەڕانەوەی زیاتر بۆ دواوە. بە دەگمەن کردارێک یان هێرشێک لۆژیکی هێز لە پشتیەوە بێت، ئیللا بەرامبەرەکە بە نەزانی خۆی پاساو بۆ هێرش و پەرچەکردار دەخاتە بەردەست دوژمن تا حیساب بۆ بوونی نەکات و هەرکات ویستیشی پەلاماری بدات. تورکیا بۆتە هێزێکی زەبەلاحی ناوچەکەو بە هێزێکی وەک ئەمریکا نەبێت ڕاناگیرێت، لەبەر ئەوە باسی ڕاگرتنی تورکیا باسێکی گەمژانەو نیشانەی تێنەگەشتنە لە سیاسەت، هەندێک هێز و پێکهاتەی سیاسی دەبوو لە جیاتی گردبوونەوەو دروشمی ڕاگرتنی تورکیا، سەرنج لە حەماقەتەکانی خۆیان بدەن نەک نمایشی ساختە بۆ خەڵک بکەن، دەتانەوێت تورکیا ئەم عەنتەریات و غەدرە ڕابگرێت، وەرنە پێشەوە سەرەتا لە جیاتی موزایەدە کردن لەسەر پارتی، پشتگیری سیاسەت و پڕۆژەی بکەن و ئەو کولانەپەکەکانە تێک بدەن، واز لە لایەنگیری ئەقلیمی بێنن و ماڵی سیاسی خۆتان ڕێکبخەن، ئەوکات خۆپیشاندان یان بەیاننامە دەربکەن، کونسوڵخانە دەسووتێنن هەرچی دەکەن بیکەن لێتان جوان دەبێت.
ئەوەی هەندێک حیزب و بەناو شەخسی سیاسی داوای دەکەن حکومەتی هەرێم بۆ<پەکەکە>ی بکات، تورکیا بەو هێز و پێگەیەی خۆیەوە هێشتا داوای ئەوەی نەکردووە بۆ تورکمانەکانی دەرەوەی وڵاتەکەی خۆی بکرێت. لەم ناوچەو جوگرافیا ئاڵۆزەدا سیاسەتی واقعی و دروست بۆ شکاندنی ئابلووقەی جیۆپۆڵەتیکی، هەروەها بۆ پاراستنی هەرێمی کوردستان و عێراق-یش لە دەستوەردانە سیاسییەکان و لە پریشکی ململانێ جەمسەرگیرییەکانی ناوچەکە، ئەوەیە کە پارتی ساڵانێکە داوای دەکات. ئەوەیە کە دەبێت ڕەچاوی باری قورسی عێراق و هەرێم لە ململانێکانی ناوچەکەدا بکرێت و، بۆ ئەوەش هەم ئەو هێزانەی کە ئۆپۆزسیۆنی وڵاتانی دراوسێن موڕاعاتی مەوقفی حکومەتی عێراق و حکومەتی هەرێم بکەن، هەم ئەحزاب و ئەشخاسی سیاسی عێراقی و کوردستانیش لەوە تێبگەن کە چی مومکنەو کامە ڕێگا دروستەکەیە. دەی مادەم جێنفوزی دەستەڵات و سیاسی خۆیان کردۆتە کولانەپەکەکە، ئیتر خۆ دەبێت چاوەڕیی هاتنی مارەکە، ڕوونتر بڵێم: پەرچەکرداری تورکیاش بکەن.