تا دێت ژمارەی بەشداربووان لە پڕۆژەی هەژماری من زیاتر دەبێت، وا بڕیارە لەگەڵ مووچەی مانگی چوار زیاتر لە 400 هەزار کەس لەڕێگەی کارتی بانکیەوە مووچەیان وەربگرن.
پڕۆژەی هەژماری من یەکێکە لە پڕۆژە ستراتیژییەکانی کابینەی نۆیەمی حکومەتی هەرێمی کورستان، ئامانج لێی بە بانکیکردنی مووچەی فەرمانبەرانە.زانیاری بەدەستهاتوو
بەپێی زانیارییەکان بۆ مووچەی مانگی 4، ژمارەی ئەو فەرمانبەرانەی لەڕێگەی کارتی بانکییەوە مووچە وەردەگرن ژمارەیان دەبێتە 405 هەزار کەس، بەمەش تا چوار مانگی ئایندە ژمارەی ئەو فەرمانبەرانەی لەڕێگای کارتی بانکییەوە مووچە وەردەگرن دەبێتە 700 هەزار کەس.
چاوەڕوان دەکرێت تا سێ مانگی تر هەموو مووچە خۆرانی هەرێمی کوردستان کە ژمارەیان لە ملیۆنێک و 150 هەزار کەس زیاترە لە هەژماری من تۆمار بکرێن. ئەو ژمارەیەی کە تا ئێستا تۆمار کراوە 732 هەزار کەسە و زیاتر لە 400 هەزار کارتی بانکی بۆ بەشدار بووان دەرکراوە.
ئەم مانگە لەگەڵ دابەشکردنی مووچەی مانگی سێ، 313 هەزار و 300 کەس لە ڕێگای ئامێرەکانی ATMـەوە مووچەکانیان وەرگرت، لەو ژمارەیە 228 هەزار و 700 کەسیان مووچەخۆری شارستانی و 84 هەزار و 600 کەسیان مووچەخۆری سەربازی بوون.
زیاتر لە 60 هەزار پێشمەرگە لە وەزارەتی پێشمەرگە و نزیکەی 20 هەزار پێشمەرگەی زێرەڤانی سەربە وەزارەتی ناوخۆ مووچەکانیان لەڕێگای ATMـەوە وەرگرت.
تیمەکانی پڕۆژەی هەژماری من تا ئێستا 560 ئامێری ATMـیان لە سەرتاسەری هەرێمی کوردستان داناوە، بڕیارە ژمارەی ئامێرەکان بۆ هەزار ئامێر زیاد بکەن.