سەرۆک بارزانی فەیلییەکان ڕێز و تەقدیری بارزانییەکانیان هەیە


 ئەمڕۆ سێشەممە 2ی ئایاری 2023، لەژێر سەرپەرشتیی و چاودێریی سەرۆک مەسعود بارزانی کۆنفرانسی زانستیی نێودەوڵەتیی جینۆسایدی گەلی کوردستان(جینۆسایدی کوردی فەیلی) لە شاری هەولێر دەستی بە کارەکانی کرد و تێیدا سەرۆک مەسعود بارزانی گوتارێکی پێشکەش کرد.

پوختەیەک لە گوتەکانی سەرۆک مەسعود بارزانی:

• کوردانی فەیلی بەشێکی سەرەکین لە گەلی کورد، زۆر ئازایانە ڕووبەڕووی هەموو ئەو هەوڵانە بوونەوە کە لەپێناو سڕینەوەیان دران، پارێزگارییان لە ناسنامە و کەلتووری خۆیان کرد.

• خەباتکارانی فەیلی ڕۆڵی گەورەیان هەبوو لە سەرکردایەتیکردنی شۆڕشی ئەیلوول.

• فەیلییەکان ڕێز و تەقدیری بارزانییەکانیان هەیە، چونکە زۆر دڵسۆزانە لەپێناو کوردستان کاریان کردووە.

• فەیلییەکان ڕووبەڕووی نەهامەتی و کارەساتی زۆر بوونەتەوە، ڕژێم بە هەموو ئامراز و کەرەستەکانەوە هەوڵی دا بۆ ئەوەی لە هەڵوێستی نەتەوەیی باشی خۆیان لایان بدا، بەڵام ڕژێم شکستی هێنا.

• فەیلییەکان بەشێوەیەکی دڕندانە پاکتاو کران.

• چارەنووسی 12 هەزار کوردی فەیلی تا ئێستا نادیارە.

• لە ساڵی 1981 لە ناوچەی عەکاشات تاقیکردنەوەی کیمیایی کرا لەسەر 300 گەنجی فەیلی، دوای ئەوە هەمان پرۆسە بەسەر 150 گەنجی دیکەی بارزانییەکان کرا و ئەوانیش شەهید کران.

• جینۆسایدی فەیلییەکان لە چوارچێوەی ئەو زنجیرە جینۆسایدانەیە کە بەرامبەر بە گەلی کوردستان کراوە.

• گەلی کوردستان ئەم تاوانانە لەیاد ناکات.

• گەلی کورد دەرفەتی تۆڵەکردنەوەی هەبوو، بەڵام لێبووردەیی نواند.

• گوتار و قسە تەنها بەس نین، بەڵکوو پێویستە بەدوای هەموو ڕێگەکان بگەڕێین بۆ ئەوەی لە داهاتوودا لەم جۆرە تاوانانە دووبارە نەبنەوە.

• هەموو قوربانییانی جینۆساید لە کوردستان بەتایبەت کوردانی فەیلی پێویستە قەرەبوو بکرێنەوە، قەرەبوویەکی دادپەروەرانە و سەرجەم مافەکانیان بۆ بگەڕێتەوە.

• لێرەوە پێشنیاری دروستکردنی ناوەندێک دەکەم لە هەولێر بۆ بەدواداچوونی کاروباری فەیلییەکان، هاوشێوەی مەرجەعێک بێت بۆ فەیلییەکان.

أحدث أقدم

نموذج الاتصال