بەیانی ئەمڕۆ سوپای ئیسرائیل ئۆپەراسیۆنێکی بۆ سەر نەخۆشخانەی شیفا لە کەرتی غەززە دەستپێکرد.
سوپای ئیسرائیل ڕایگەیاند: چەکدارانی بزووتنەوەی حەماس نەخۆشخانەکان بۆ کاری تیرۆریستی بەکاردەهێنن”، بۆیە لە بەشێکی دیاریکراوی نەخۆشخانەی شیفا ئۆپەراسیۆنێکیان دەستپێکردووە و تا رزگارکردنی بارمتەکان لە ئۆپەراسیۆنەکانیان بەردەوام دەبن.
هاوکات بزووتنەوەی حەماس رایگەیاند، سەربازانی ئیسرائیل بە تانکەوە چوونەتە ناو بەشی فریاکەوتنی نەخۆشخانەی شیفا و تەواوی بەرپرسیارێتییەکانیش لە ئەستۆی جۆو بایدن سەرۆکی ئەمریکایە.
وەزارەتی تەندروستی فەڵەستین ڕایگەیاند، سوپای ئیسرائیل تاوانکارییەکی دیکە دژ بە مرۆڤایەتی و تیمە پزیشکی و نەخۆشەکان ئەنجامدەدات.
لای خۆیەوە نووسینگەی راگەیاندنی حکومەت لە کەرتی غەززە، رایگەیاند: هێرشی هێزەکانی ئیسرائیل بۆسەر نەخۆشخانەی شیفا تاوانی جەنگە.
بەڕێوەبەری گشتی نەخۆشخانەی شیفا لە کەرتی غەززە ئاماژەی بەوە کردووە “هێزەکانی ئیسرائیل هەڵیانکوتاوەتە سەر بەشی نەشتەرگەری فریاگوزاری لە نەخۆشخانەکە”.