ڕۆژنامەنوس ئەسرین عاسی شوانی:
دوێنێ بە ناوی 17ی شوباتەوە دەیانویست بەهاری عەرەبی بۆ ئێرە بگوازنەوە و کوردستان بە چارەنووسی ڕەشی لیبیا و یەمەن بگەیەنن، بەڵام مەرامە گڵاوەکانیان ئاشکرا و دیار بوو، بۆیە نەیانتوانی خەونی نەزۆکیان بهێننە دی.
ئەمڕۆ گوفتار و کرداریان بەردەوام لە هەوڵی مراندنی گیانی کوردایەتی و ناشیرینكردنی هەرێمی کوردستانە.
عەلی باپیری کۆمەڵی دادگەری لەبری ئەوەی وەڵامی بۆ پرسیارە پڕووکێنەر و سەختەکان هەبێ، دەیەوێ ئەزموونی گەلی کوردستان و قەوارەی هەرێم بلەوتێنێ.
ئایا باشتر نییە عەلی باپیر وەڵامی کاکە حەمەی حاجی مەحموودی سکرتێری پارتی سۆشیال دیموکرات بداتەوە و جێ و ڕێ بۆ گوژمەی یەک ملیۆن دۆلار بکاتەوە، کە لە ئێران وەریانگرتوو؟
ئایا باشتر نییە عەلی باپیر وەڵامی ئەوو بەڕێزانە بداتەوە کە بە بەڵگەی نووسراو و تەحەداوە باسی مەلەف و کارکردنی عەلی باپیری لە بەرژەوەندیی موخابەراتی عێراقی بەعسدا کردووە؟
ئایا باشتر نییە عەلی باپیر قسەکانی (سەباح ئەلحەمدانی) ڕەت بکاتەوە، کە دەڵێ عەلی باپیر چاوی تیژی موخابەراتی عێراق بووە و پەیوەندیی توندوتۆڵی لەگەڵیاندا هەبووە؟
دیارە ئەو بەڵێنانەی لە کاتی خۆیدا بە دوژمنی داوە و بۆی نەچووەتە سەر، بەڵام ئێستاش سوورە لەسەری و دەیەوێ لە بەڵێنی دژەگەلی پەشیمان نەبێتەوە و بە هەر شێوازێ بێ کورد و کوردستان بخاتە نێو قەرەوڵی کرێگرتەییەوە.
هاوشانی عەلی باپیر، هەرزە سیاسی (هەیسەم عەبدلواحد) کە بە ناوی شاسوارەوە هەڵتۆقیوە و دەبوو ناوی (شادز)ی بۆ خۆی هەڵبژاردایە، دەیەوێ هەمان هەوڵی لەبارچوو دەمەزەرد بکاتەوە و لەکەدارکردنی ناوی کورد و کوردستانی لەئەستۆ گرتووە، بەڵام دەبوو ئاوڕێک لە خۆی بداتەوە، ئینجا بێتە گۆ.
ئایا باشتر نییە لەجیاتی ئەوەی سواڵکەرئاسا لەبەردەم دەرگای دادگای باڵای فیدڕاڵیی عێراق بکەوێ و هەوڵی ناشیرینکردنی کوردستان بدا، لە خۆی بپرسێ، چۆن و بە چی وا هەڵتۆقی و بە سەدان دۆنم زەوی خراوەتە خزمەتییەوە و پرۆژەی گەشتیاریی (چاڤی لاند)ی تێدا دامەزراندووە، لە کوێی بوو؟
ئایا باشتر نییە بچێ بەدەم سکاڵای سەدان هاووڵاتی، کە بە ناوی (پشک)ەوە دەستی بڕیون و پارەی خواردوون و لەسەر شانی ئەوان سەرمایەی زیاتری کەڵەکە کردووە؟ ئەی ئەگەر دەسەڵاتی بەدەست بێ دەبێ چی لە خەڵک بکا؟
ئایا باشتر نییە هیچ نەبێ نیوەی ئەو سکاڵایانەی دژی حکوومەتی هەرێمی كوردستان، بە خۆی و سروەی خوشکیەوە لە دادگای فیدڕاڵی تۆماریان کردووە، لە هەمبەر تەعریب و خۆدزینەوەی بەغدا لە جێبەجێکردنی مادەی ١٤٠ سکاڵا لەسەر حکوومەتی ناوەند تۆمار كردبا؟
ئۆپۆزسیۆنی ئەمڕۆی هەرێمی كوردستان بۆیە ڕۆڵ و کاریگەرییان نییە، چونکە هاوشێوەکانی عەلی باپیر و شاسوار خۆیان سەرقافڵەی گەندەڵین، نەک هەر لە ڕووی داراییەوە، بەڵکوو لە ڕووی سیاسی و کۆمەڵایەتییشەوە، بۆیە داکۆکیکردن لە مافی خەڵک، كەسی تیکۆشەری دەوێ، تێکۆشەری مەرد، نەک سەرشۆڕانی دیوەخانی داگیرکارانی کوردستان.
بێ گومان ئەوانەی وەکوو ئەوان دوای مەرامی تایبەتی خۆیان کەوتوون، نەک بەرژەوەندیی باڵای گەل و نیشتمان، زوو بێ یا درەنگ دەستیان ئاشکرا دەبێ و لەبەردەم مێژوودا ڕیسوا دەبن